Is ceiliúradh náisiúnta na hÉireann ar ealaíona, cultúr agus oidhreacht na hÉireann í Féile Pádraig, agus tá sí ar cheann de na féilte cultúrtha is fearr ar domhan. Tionóltar an Fhéile i mí an Mhárta gach bliain i mBaile Átha Cliath agus cuireann sí beocht sa chathair le clár ceithre lá lán le ceol, taibhléiriú, mórthaibhsiú, damhsa, amharclannaíocht, litríocht, na hamharc-ealaíona, bia, agus gníomhaíochtaí faoi stiúir an phobail. Is í Paráid íocónach Lá Fhéile Pádraig croílár na Féile. 

 Bunaíodh an Fhéile sa bhliain 1996, agus d’fhás sí ó cheiliúradh aon lae go dtí ardán cultúir a aithnítear ar fud an domhain agus a léiríonn traidisiúin sheanbhunaithe na hÉireann agus an saol bríomhar cruthaitheach comhaimseartha. Is buaicphointe tábhachtach d’fhéilire cultúrtha na hÉireann í sa lá atá inniu ann, agus léiriú cumhachtach ar Éireannach an lae inniu; duine atá áthasach, uilechuimsitheach, le hintinn oscailte agus atá fréamhaithe sa phobal. 

 Tá tionchar mór eacnamaíoch, sóisialta agus cultúrtha ag Féile Pádraig. In 2025, ghin an Fhéile €138 milliún do gheilleagar na hÉireann, íocadh €32 milliún leis an Státchiste, cruthaíodh os cionn 10,500 lá fostaíochta, agus cuireadh fáilte roimh níos mó ná 550,000 freastalaí ag 231 imeacht. Déanann an Fhéile teagmháil le breis agus 600 milliún duine gach bliain agus tá ról ríthábhachtach aici chun Éire a thaispeáint mar cheann scríbe cultúrtha ar chaighdeán domhanda agus áit thar a bheith fiúntach le cuairt a thabhairt uirthi gach Márta, rud a mheallann turasóirí sa séasúr seachbhuaice. Tacaíonn an Fhéile go hollmhór le hearnáil chruthaitheach na hÉireann. Fostaítear na mílte ealaíontóirí, oibrithe ealaíon, gairmithe imeachtaí beo, grúpaí pobail oibrithe deonacha gach bliain. Oibríonn na céadta cruthaitheach agus cuideachta paráide sa chúlra i rith na bliana chun an Fhéile a thabhairt chun críche, agus foireann bheag lárnach thiomanta ag tacú leo. 

 Faoi cheannaireacht an Phríomhoifigigh Feidhmiúcháin, Richard Tierney, tá Féile Pádraig ag céim fáis chlaochlaitheach agus inbhuanaithe anois. Tá straitéis shoiléir leagtha amach don Fhéile le haghaidh 2026–2029, agus tá forás ag teacht uirthi an t-am ar fad, mar cheiliúradh náisiúnta suaitheanta a bhfuil fréamhacha doimhne aici agus aitheantas uirthi ar fud an domhain, lena n-áirítear pleananna i gcomhair mórthaibhsithe cultúrtha nua ar scála mór sna blianta amach romhainn. 

 Is eagraíocht sheachbhrabúsach neamhspleách í Féile Pádraig a bhfuil stádas carthanais aici agus faoi rialú Bhord Stiúrthóirí . 

An Téama

Fréamhacha an téama le haghaidh Féile Pádraig 2026, ceiliúradh ar ár n-áit dhúchais, ar an méid a choinníonn ár gcosa ar an talamh, agus ar an gcaoi a leanaimid orainn ag fás le chéile. 

Tá ceangal láidir ag Éire le scéalaíocht agus gnás. Is tír í ina maireann miotais ársa in éineacht le cultúr an lae inniu, agus ina roinntear deasghnátha séasúracha agus nósanna caidrimh laethúla sna pobail. Tá fréamhacha na hÉireann le fáil ní hamháin sa stair agus sa bhéaloideas, ach i dtaithí saoil gach duine a thugann ‘an baile’ ar an oileán seo, agus tionchar ar an tír ag imirce, eisimirce agus malartú cultúir ó ghlúin go glúin. 

In 2026,tá an Fhéile ag déanamh fiosrú ar fhréamhacha mar rud atá beo agus ag éabhlóidiú, agus tá cuireadh á thabhairt don lucht féachana machnamh a dhéanamh ar fhéiniúlacht, muintearas agus na scéalta atá i bpáirt againn. Ag an am céanna, tá spás á chruthú ag an bhFéile le haghaidh guthanna nua agus léirithe comhaimseartha ar chultúr na hÉireann. 

Clár beo bríomhar ar fud na cathrach

Tá cuireadh á thabhairt ag Féile Pádraig 2026 do mhuintir na háite agus do chuairteoirí chuig clár beo bríomhar ar fud na cathrach ina mbeidh breis agus 150 ealaíontóir páirteach i gcúrsaí ceoil, amharclannaíochta sráide, damhsa, ceardaíochta, grinn agus taibhléirithe rannpháirtíochta. 

Tá comhoibriú agus inrochtaineacht i gcroílár chlár na bliana seo. I measc na mbuaicphointí beidh bannaí máirseála, fuaimdhreacha tumthacha, damhsóirí faoi stiúir ag cathaoireacha rothaí, bailé do dhaoine os cionn 55 bliana d’aois, amharclannaíocht Éireannach den chéad scoth, scéalaíocht fhochultúir, ceardlanna ceardaíochta rannpháirtíochta, moil do theaghlaigh agus spásanna do dhaoine néara-éagsúla. Le chéile, léiríonn na heispéiris sin scéal comhroinnte na hÉireann – scéal atá fréamhaithe i ngnás, pobal agus malartú cruthaitheach. 

Buaicphointí na féile ar fud na cathrach 

Beidh Baile Átha Cliath lán spraoi agus spleodair ar feadh deireadh seachtaine na Féile, le taibhléirithe agus eispéiris rannpháirtíochta a fhásann go nádúrtha ar na sráideanna agus a mheallann daoine chun teacht le chéile agus eispéiris a roinnt le teann muintearais. 

Beidh an lucht féachana in ann sult a bhaint as ceol ar na sráideanna ó Mr Wilson’s Second Liners agus dream a bhfuil an-tóir orthu i mBaile Átha Cliath, Acid Granny Compact; beidh greann i nGaeilge le fáil i seó Áine Gallagher, A Cup of Focals; agus beidh taibhléirithe grinn sráide ann, ina measc Garda le Colm O’Grady agus St. Patrick’s Seagulls. 

Maidir le cúrsaí damhsa beidh an bailé Silver Swans, a cruthaíodh go speisialta do dhaoine os cionn 55 bliana d’aois, chomh maith le saothar Maryam Madani, taibheoir damhsa agus gníomhaí a úsáideann a cleachtas faoi stiúir cathaoireach rothaí chun mórtas daoine faoi mhíchumas a cheiliúradh mar ghníomh forbartha pobail áthasach. Cuirfidh Luail, Compántas Náisiúnta Damhsa na hÉireann, Dance Corner, faoi choimeádaíocht Dylan Quinn, i láthair. 

Beidh deis ag lucht leanúna na hamharclannaíochta sult a bhaint as léiriú speisialta de The Plough and the Stars in Amharclann na Mainistreach, 100 bliain ó cuireadh ar an stáitse é den chéad uair. Beidh ceardlanna ceardaíochta ar siúl, inar féidir triail a bhaint as ceardaíocht thraidisiúnta agus chomhaimseartha, ina measc lásadóireacht, gaibhneacht stáin, fíodóireacht sailí agus feiltbhrat. 

Beidh imeachtaí ar siúl ag áiteanna aitheanta ar fud na cathrach, ina measc Amfaitéatar na Cé Adhmaid, EPIC, Páirc Wolfe Tone, Drioglann Jameson, Lár Bhaile Dhún Droma agus an t-ardán banna ceoil i bhFaiche Stiabhna. 

An teaghlach, an pobal agus cultúr na hOíche

Freastalóidh Féile Pádraig 2026 ar éagsúlacht an lucht féachana le clár a chuireann glúnta, ábhair spéise agus féiniúlachtaí éagsúla san áireamh. 

I rith an lae, cuirfidh moil atá dírithe ar an teaghlach spásanna fáiltiúla agus spraíúla ar fáil, mar shampla Sráidbhaile na dTeaghlach de chuid Chomhairle Cathrach Bhaile Átha Cliath ag an gCé Adhmaid. Beidh imeachtaí ar siúl sna moil sin, mar shampla DJ Seanem, an DJ is óige in Éirinn a chasann ceol ag féilte, Bus Leabharlann Chathair Bhaile Átha Cliath agus eispéiris chruthaitheacha le Brící Spraoi. 

Tar éis luí na gréine, tabharfaidh an Fhéile aghaidh ar chultúr oíche fuinniúil Bhaile Átha Cliath. I measc na mbuaicphointí le bheith ag súil leo, casfaidh Henrik Schwarz in Pygmalion an 16 Márta agus beidh Taibhléirithe Tine na Féile ar siúl an 14 agus an 15 Márta, rudaí a chruthóidh eispéiris chultúrtha chomhroinnte do dhaoine fásta agus an bhéim ar an gcraic, an féith ghrinn Éireannach a bhfuil cáil uirthi ar fud an domhain.